GENERAL SANTOS CITY – Gikumpirma ni Lady Manalo sa City Sports Division nga hatagan ug hero’s welcome sa dakbayan si Romero “Ruthless” Duno nga midaog sa natigayong engkwentro niini sa miaging semana didto sa Los Angeles, California sa Amerika sa miaging semana sa pag-uli niini karong Marso 22.
Kahibaluan nga gi-knockout ang mehikano nga si Christian “Chimpa” Gonzales nga walay pildi, atol sa second round.
Matud pa ni Manalo nga nakig-alayon na sa sila sa Civil Aviation Authority of the Philippines kon CAAP-Gensan kalabot sa pagsugat kang Duno sa airport alang sa hero’s welcome.
Gikadugang pa niini nga mulahos ang nasampit sa City Hall.
Gumikan sa iyang kadaugan batok kang Gonzales, naangkon niini ang World Boxing Council (WBC) Youth Intercontinental lightweight belt.
Kahibaluan nga si Duno ang gibansay ni kanhi World Champion Rodel “Batang Mandaue” Mayol sa Wild Card Gym ni Coach Freddie Roach.
Sa unang round pa lamang gipatumba na ni Duno ang maong mehikano apan nakaluwas. Apan pag-abot sa second round, naigo ang kaatbang sa solidong kinumo sa maong Gensan boxer.
Nalisdan na si Gonzales nga mutindog hinungdan nga gideklara ni Referee Thomas Taylor nga daog ang Pinoy boxer atol sa 57 seconds sa second round.
Sa pagkakaron adunay 13 ka daog ang maong Gensan boxer ug 12 ka knockouts ug usa ang pildi.
