Gipusil-patay sa wala mailhing gunman ang hepe sa Registry of Deeds Region 9 atubangan mismo sa iyang buhatan sa Pettit Baracks, Zone IV, Zamboanga City.
Ang biktima giila nga si Atty. Villarin Jayvee Bagunda.
Sa inisyal nga report, ang biktima gipusil sa wa mailhing riding-in-tandem nga suspek nga nag-facemask ug wala mag-helmet.
Sa pahayag ni PLT. Col Paul Andrew Cortes, Deputy City Director sa Zamboanga City Police Station Office, niingon nga duha ka mga suspek ang mibanhig sa pag-abot sa biktima sa nahisgutang lugar.
Nasayran nga nakuhaan og CCTV footage ang insidente ug nakuhaan usab ang pag-ikyas sa usa ka itom ug asul nga Suzuki Raider nga may plakang numero 951, paingon sa Brgy. Ang Sta. Catalina human sa pagpamusil.
Sa pagkakaron, padayon pa ang imbestigasyon sa mga otoridad aron masuta ang motibo sa pagpusil sa biktima.
Giawhag usab ang bisan kinsa nga adunay kasayuran nga modangop sa kapolisan aron motabang sa imbestigasyon.
