Nibaliktad ang direksyon sa kanhing Department of Public Works and Highways (DPWH) Bulacan District Engineer nga si Henry Alcantara ug mihimakak sa iyang kalambigitan sa mga “ghost” nga proyekto sa pagkontrol sa baha ug kickback scheme.
Bisan pa sa iyang nangaging mga pahayag atol sa mga hearing sa Senate Blue Ribbon Committee, kusganong gipahayag ni Alcantara sa iyang counter-affidavit nga wala siyay kalabotan sa mga iregularidad.
Ang mga detalye sa iyang depensa migawas kalabot sa nagpadayon nga imbestigasyon sa Department of Justice (DOJ).
Sumala ni Alcantara, walay igo nga ebidensya aron siya makonbikto sa mga kaso nga may kalabotan sa giingong mga anomaliya sa mga proyekto sa pagkontrol sa baha.
Giinsistir usab niya nga walay pruweba nga iyang gipaboran ang bisan kinsang kontraktor, empleyado o indibidwal sa pagpatuman sa mga proyekto nga gikuwestiyon.
Gidugang sa kanhing opisyal nga walay saksi nga makaingon nga iyang giaprobahan ang ilegal nga mga bayad o peke nga mga report nga may kalabotan sa proyekto sa pagkontrol sa baha.
Miingon siya nga ang giingong “ghost projects” gitago gikan kaniya sa iyang mga kawani.
Hugot usab niyang gihimakak ang mga akusasyon sa bribery ug bid-rigging sa pagpamalit sa mga proyekto sa DPWH ug gipasiugda nga kini dili kabahin sa iyang mga katungdanan.
Miingon siya nga ang iyang papel isip district engineer puro ministerial ug gipirmahan lang niya ang mga dokumento nga giandam ug gisumite sa iyang mga sakop.
Bisan pa, si Acting Justice Secretary Frederick Vida miingon nga si Alcantara nakabalik na og kapin sa P100 milyon sa DOJ isip restitution sa flood control scam.
Sa pagkakaron, ang DOJ nagdumili sa pagkomento pa samtang nagpadayon ang pasiunang imbestigasyon sa kaso.
