GENERAL SANTOS CITY – Magpadayun gihapon ang committee hearing kalabutan sa revocation sa concurrence sa operasyon sa STL kon Small Town Lottery dinhi sa dakbayan.
Kini human nga wala nadayun sa miaging semana ang pagdungog gumikan nagsakit si Kagawad Jeng Gacal, ang chairperson sa Committee on Games and Amusement sa konseho. Nasayran nga gipagamyan ang share sa syudad nga anaa sa .5 percent na lamang gikan sa gikasabotan nga 3 percent gikan sa kita sa STL base sa ilang pakig-kontrata ngadto sa lokal nga panggamhanan.
Hangtud karon wala pay gisumite ang PCSO-GenSan sa buhatan ni Kag. Gacal nga kopya nga magpamatuod nga nakabayad na ang Trento Gaming Corporation nga gitahasan nga maoy mag-operate og STL sa GenSan.
Lakip pa sa tukion sa ipadayong hearing nganong gipagamyan ang target nga kita sa STL nga gihimo na lamang P11 million gikan sa P20 million luyo nga walay pagpahibalo.
Nasayran nga nagpasa si Kagawad Liklik Tan og resolusyon aron pag-revoke sa operasyon sa STL sa syudad.
