Nagpadayon ang pagmonitor sa transboundary haze o aso nga gikan sa forest ug land fires sa Kalimantan, Indonesia, nga nakaapekto sa pipila ka lugar sa Mindanao.
Apan, wala pay kumpirmadong basehan nga hazardous o delikado ang kalidad sa hangin sa General Santos City.
Gipasidan-an gihapon ang publiko nga mahimong mausab ang kahimtang sa haze depende sa direksyon sa hangin, panahon ug pag-ulan.
Gidasig ang pagsul-ob og N95 o KN95 mask kung mogawas, paglimit sa outdoor activities ug paglikay sa bug-at nga ehersisyo kung baga ang haze.
Gipahinumdoman usab ang mga bata, senior citizens, mabdos ug mga adunay asthma o sakit sa kasingkasing ug respiratory system nga likayan ang dugay nga exposure sa gawas.
Ang mga motorista gitambagan nga magmatngon tungod sa posibleng pagkunhod sa visibility. Kung makasinati og lisod nga pagginhawa, sige-sige nga ubo, wheezing, kasakit sa dughan o grabeng pangatol sa mata, mobalhin sa mas limpyo nga lugar ug magpakonsulta kung gikinahanglan. Mosalig lamang sa opisyal nga impormasyon gikan sa DENR-EMB, PAGASA, DOH ug CDRRMO.
