Gipanganlan na ni Philippine Amusement and Gaming Corporation kon PAGCOR Chairman Alejandro Tengco si kanhi Presidential spokesman Harry Roque nga mao matud pa’y nagplastar aron mahatagan og lisensya ang ilegal nga Philippine Offshore Gaming Operators (POGO) kansa gi-raid sa mga otoridad tungod kay nalambigit matud pa sa mga krimen.
Sa pagdungog sa Senate Committee on Women and Children, gibutyag ni Tengco nga si kanhi Presidential Spokesperson Harry Roque ang nag-lobby alang sa POGO hub nga Lucky South 99 sa Porac, Pampanga.
Niadto matud pang ikatulong semana sa Hulyo 2023, nakadawat ang PAGCOR og tawag gikan kang Roque nga nangayo og appointment kaniya rason nga nakabisita si Roque sa iyang opisina niadtong Hulyo 26 sa susamang tuig ka-uban si Katherine Cassandra Ong, ang authorize representative sa Lucky South 99.
Matud ni Tengco, ka-uban niyang nakigsulti kang Atty Roque si Atty. Jessa Fernandez and nangulo kaniadto sa Gaming and Licensing Division sa PAGCOR.
Mihangyo matud pa si Roque nga tabangan si Ong tungod kay duna ‘yarrears o utang ang ilang kompanya nga mu-abot sa $500,000.00US tungod kay gi-ilad matud pa sila ni Dennis Cunanan dihang wala niini gibayad sa maong ahensya ang gaming fees ug uban pang additional fees.
Si Cunanan matud pa ang nag-facilitate sa mga dokumento alang sa lisensya sa Lucky South 99 isip representante sa maong POGO hub nga nakarehistro sa PAGCOR rason nga ingon niadto na lang ang ilang pagsalig kang Cunanan.
