Gisupak sa mga piskal sa International Criminal Court (ICC) ang hangyo sa kampo ni kanhi Pangulong Rodrigo Duterte nga ipa-disqualify ang duha ka huwes sa pagdesisyon sa isyu sa hurisdiksiyon sa korte kalabot sa kaso sa kanhi Presidente.
Sa miaging Mayo 2, ang lead counsel ni Duterte nga si Nicholas Kaufman, mipasaka og petisyon sa ICC aron i-diskwalipika si Pre-Trial Chamber I Judges Reine Adélaïde Sophie Alapini-Gansou ug María del Socorro Flores Liera gikan sa paghukom sa ilang gi-question nga hurisdiksiyon sa korte.
Gipasabot sa kampo ni Duterte nga pinaagi sa pagdiskwalipika sa duha ka huwes, maprotektahan ang iyang katungod alang sa usa ka “walay kinikilingang paghatol..”
Apan, base sa tubag sa ICC prosecutors niadtong Mayo 22, pormal nga gisalikway ni Deputy Prosecutor Mame Mandiaye Niang, nga nagrepresentar sa Office of the Prosecutor, ang maong hangyo. Matod niya, napakyas ang depensa sa pagpakita og ebidensya nga nagpakita og pagkahilig o bias ang duha ka huwes.
Supak sa gisulti sa kampo ni Duterte, wala pa maghimo og desisyon ang duha ka huwes kabahin sa hurisdiksiyon ug wala pa kini mopabor sa pikas panig.
Sila Gansou ug Liera kabahin sa chamber nga naghatag og otorisasyon sa ICC prosecutor nga ablihan ang imbestigasyon sa war on drugs ni Duterte niadtong 2021 ug ipadayon ang nasuspinde nga imbestigasyon niadtong 2023.
Sa pagkakaron, nagpabilin nga nakapriso si kanhi Pangulong Duterte sa The Hague, Netherlands samtang nagpaabot pa sa kumpirmasyon sa mga kaso nga giakusahan batok kaniya, lakip ang crimes against humanity nga may kalambigitan sa madugong war on drugs, nga nakatakda karong buwan sa Setyembre
