GENSAN- Nakapag-apod-apod na ang National Commission of Senior Citizens o NCSC Region 12 og cash gift ngadto sa 5,694 ka benepisyaryo, sumala sa pinakabag-ong datos niini as of August 26.
Matud sa Dr. Jett Oco,Regional Director sa NCSC-12 nga mokabat na sa P59.8 milyon ang kinatibuk-ang cash gift nga na-release ngadto sa mga benepisyaryo.
Gilauman usab nga madugangan pa ang ihap sa mga senior citizen nga makadawat sa maong ayuda, diin target sa NCSC nga makaserbisyo og labing menos 3,000 ka benepisyaryo matag quarter.
Gipahibalo usab nga posible nga adunay espesyal nga cash gift distribution nga gitawag og “Handog ng Pangulo” atol sa pag-abot sa adlaw nga natawhan ni Pangulong Ferdinand “Bongbong” Marcos Jr. sa September 13.
Matud sa NCSC 12, ang mga senior citizen nga nakapag-apply na angay nga maghulat sa pahibalo pinaagi sa ilang Office for Senior Citizens Affairs o OSCA sa lokal nga panggamhanan.
