GENERAL SANTOS CITY – Gihikay na sa kapulisan ang mga dokumento alang sa pagpasaka og kaso batuk sa usa ka negosyante human nga nakumpiska atol sa gipahigayong raid ang 1,632 ka bandol sa mga ukay-ukay, panapton og uban pa.
Mag-atubang ang babayeng negosyante sa RA 4653 kon “Commercial Importation of Textile Articles commonly known as Used Clothings and Rugs”.
Kahinumduman nga pinaagi sa search warrant gisulod sa mga sakop sa Regional Intelligence Unit 12 og San Isidro Police Station ang usa ka bodega sa National Highway, Villa Consuelo, Barangay City Heights ning dakbayan.
Halos P20 Million ang kantidad sa nakumpiskang kontrabando tungod gikabutyag nga nagbalor og P8,000 ang matag bundle sa ukay-ukay nga gikan matud pa sa South Korea.
Sa karon kustodiya sa Police Regional Office 12 Headquarters ang mga nakumpiskang kontrabando.
