GENSAN – Mukabat sa 179 ka drug surrenderees ang gideklara nang drug-dependence free dinhi sa siyudad.
Atul kini sa gipahigayong graduation nila, human ang pagpailawom kanila sa Community-Based Rehabilitation Program (CBRP) sa Philippine National Police (PNP) ug lokal nga panggamhanan sa GenSan, aron matabangan ang nahisgutang mga indibidwal nga makalingkawas sa ilang pagkagumon sa iligal nga droga.
Gilusad kini kaniadtong December 2016, human gisugdan ang “war on drugs” sa Duterte administration.
Gipailawom ang mga recipients sa 32-week rehabilitation program kung asa nagtambayayong ang City Social and Welfare Development Office (CSWDO) ug usa ka simbahan sa pagpahigayon ug psychosocial counseling sa nahisgutang mga indibidwal.
Base sa record, gilangkuban ang nahisgutang mga kanhing drug surrenderees sa 16 gikan sa Brgy Batomelong, 25 sa San Jose, 24 sa Baluan, 64 sa Apopong, siyam sa East ug sa Fatima, 33 sa Lagao ug usa sa Upper Labay.
Matud kang Rebecca Magante, laabw sa CSWDO, makadawat ug nagkalain-laing benepisyo gikan sa siyudad ang nasampit nga surrenderees.
Nasayran nga sa karon, mukabat na sa 600 ang recipients sa CBRP, kung asa ang nasampit nga 179 mao ang ikaduhang batch.
