Gwardiya gipusil-patay sa GenSan!
GENERAL SANTOS CITY – Blangko pa ang mga sakop sa San Isidro Police Station kalabot sa posibleng motibo ug ilhanan sa suspek nga mipusil-patay sa gwardiya kagahapon sa kaadlawon sa Las Villas Subdivision, Brgy City Heights ning dakbayan.
Kahinumduman nga gidala gilayon ug gilubong na sa Isulan, Sultan Kudarat base sa tinuuhang Islam, ang patay’ng lawas sa biktima nga si Abdul Acay, 37 anyos, taga-Palembang, apan temporaryong nagpuyo sa Johnny Ang ning siyudad.
Kahibaluan nga natigayon ang insidente samtang anaa sa duty ang biktima sa may entrance sa nasampit nga subdibisyon, atubangan sa usa ka simbahan duol sa Mindanao Medical Center sa Mabuhay Rd.
Narekober sa crime scene ang usa ka empty shell nga gituuhang gikan sa .45 caliber pistol.
Kahibaluan nga nakaangkon ang biktima ug usa ka samad-pinusilan sa wala nga mata nga milapos sa likod sa iyang ulo nga maoy hinungdan sa iyang hinanaling kamatayon.
Kahinumduman nga gikumpirma ni Police Chief Inspector Hoover Antonio, hepe sa nasampit nga presinto, nga kanhi nang may-gipablotter ang biktima sa ilang police station gumikan sa nadawat nga bahad sa kinabuhi.
Una nang nakaangkon ug paglaum ang kapulisan gumikan sa mga CCTV nga nakamuntar sa palibot sa crime scene, kung asa may nasiplatan matud pa nga miagi nga nakamotorsiklo ug nakahelmet, apan dili kadto magamit gumikan guba ang hard drive sa naasoy’ng camera.
