GENERAL SANTOS CITY – Balhug sa Polomolok Municipal Police Station ang usa ka gwardiya human aksidenteng makablit ang issued firearm nga 12-guage shotgun ug naigo ang kaubang nga laing gwardiya.
Giila ang suspek nga si Eduardo Baybay, taga Brgy Poblacion, Polomolok, South Cotabato.
Sa impormasyon, samtang anaa sa trabaho ang suspek sa usa ka kooperatiba sa lugar, gisulayan niining i-unload ang pusil apan aksidente nakablit.
Mibuto matud pa ang armas ug naigo ang tiles nga salog, kung asa may mga tipaka nga mipisik sa kauban niini nga gwardiya nga giilang si Musid Salino, taga-Tupi, South Cotabato, hinungdan nga nasamdan sa kamot ug bukton.
Gilayong gidala sa pribadong ospital sa Polomolok ang biktima ug anaa sa luwas nga kahimtang.
Samtang padayong giimbestigahan sa kapulisan ang insidente, ug ugmang adlawa, Lunes, posibleng kasuhan ang suspek nga gwardiya.
