GENERAL SANTOS CITY – Gipakita ni Senator Risa Hontiveros nga gikumpirma na sa National Bureau of Investigation nga misibu ang fingerprints ni suspended Mayor Alice Guo ug Guo Hua Ping.
Sa post online sa Senadora, gibutyag niini nga napamatud-an na ang dugay nga pagduda nga “Pekeng Pilipino” ang kasamtangang Mayor sa Bamban, Tarlac.
Usa kini ka Chinese National nga nagtakuban nga Pinoy aron pangunahan ang mga krimen sa Philippine Offshore Gaming Corporation (POGO).
Paigo na kini nga ebidensya aron palagputon sa pwesto si Guo.
Ang pagpamakak niini ug pagtakuban ang usa ka dakong insulto sa mga botante sa Bamban, mga institusyon sa gobyerno ug sa matag residente nga Pilipino.
Una nang gipanghimakak sa kampo ni Mayor Guo ang alegasyon nga usa lang ang Alkalde ug si Guo Hua Ping.
Sa karon, nanawagan ang Senadora sa Office of the Solicitor General nga paspasan ang pagpasaka ug quo warranto case batuk sa Mayor ug gipaniguro nga magpadayon ang ilang imbestigasyon sa Senado.
