Gipahimangnoan ni Police Col. Nicomedes Olaivar Jr., ang City Director sa General Santos City Police Office (GSCPO), ang tanang katawhan nga mobisita pa sa ilang mga minatay nga likayan ang pagdala og mga unnecessary items o mga butang nga makahatag og kalibog ug disgrasya sulod sa mga sementeryo.
Sumala ni Col. Olaivar, hugot nga ginasang-at ang pagbawal sa pagdala og mga mahait nga hinagiban sama sa kutsilyo, lighter, mga ilimnong makahubog, baraha, sound system, ug bisan unsang matang sa armas. Gidili usab ang pagdala og backpack, belt bag, ug portable baggage aron malikayan ang posibleng pagpanglimbong o kalihokan nga makapahasol sa katawhan.
Gipasabot sa GSCPO nga kini nga mga lakang kabahin sa seguridad nga ipatuman samtang daghang katawhan ang nagbisita sa mga sementeryo atol sa paghinumdom sa Kalag kalag
Dugang pa ni Col. Olaivar, adunay mga kapulisan nga magbantay sa matag sementeryo aron masiguro ang kalinaw ug kahapsay sa tanan. Giawhag usab niya ang publiko nga magpakita sa kooperasyon ug pagsabot sa mga balaod aron malikayan ang bisan unsang insidente nga makasamot sa kasamok sa kalinaw ug seguridad sa dakbayan.
