GENSAN- Padayon ang pagpangita karon sa General Santos City Police Office sa responsableng tawo nga nagbiya og usa ka fetus nga gibanabanang anaa na pito ka bulan, nga nakaplagan daplin sa baybayon sa Zone 8 Brgy. Bula General Santos City ning adlawa, Agosto 24, 2026.
Matod ni PLTCOL. Rexor Jake Canoy, spokesperson sa GSCPO, adunay mga residente nga nakamatikod sa fetus ug dali niining gipahibalo sa kapulisan.
Apan, wala pa matino sa mga otoridad kung pila na ka adlaw o oras nga nabilin ang fetus sa maong lugar.
Sumala ni Canoy, gipaubos na sa forensic investigation ang fetus aron matino ang dugang nga mga detalye kabahin sa insidente.
Samtang padayon pa sa mga kapulisan ang follow-up investigation aron mailhan ug makit-an kung kinsa ang responsable sa maong pagbiya sa fetus.
Gipahinumdoman usab ni Canoy ang mga indibidwal nga mahimong responsable sa maong kahimtang nga adunay silot nga ilang atubangon subay sa balaod.
Giawhag usab niya ang mga adunay problema panahon sa pagmabdos nga makigduol ug mangayo og tabang sa kapulisan ug sa lokal nga panggamhanan sa General Santos City, nga andam matud niya nga motabang sa mga nagkinahanglan.
