GENSAN-Aduna nay ginasundan nga Person of Interest ang Makar Police Station sa nahitabong pagpamusil patay sa usa ka sikad driver nga si Sajid Bituanon, 36 anyos sa Purok Acharon, Barangay Labangal ning syudad sa Gensan alas 11:50 sa miaging gabei.
Sumala pa ni Police Major Miguel Angelo Quidilla ang hepe sa Police Station 2 nga sa karon aduna silay duha ka mga person of interest nga ginasuta nga posibleng mipusil sa biktima nga residente sa Purok Kulasi, Barangay Labangal.
Aduna na usab silay mga motibo ug anggulo nga ginasundan karon apan dili pa nila mamahimong ibutyag gumikan padayon pa ang ilang imbestigasyon.
Sa karon ginasuta usab ang posibleng mga kuha sa CCTV sa palibot kung asa gipusil ang biktima aron mailhan ang mga suspek. Dugang ni Quidilla nga gisusi na usab ang background sa biktima.
Samtang, blangko pa ang pamilya sa motibo sa pagpamusil patay kang Sajid.
Nasayran nga samtang nagatorno sa gasolinahan ang biktima aron maghulat og pasahero dihang miabot ang mga suspek ug gipusil sa makaduha ka higayon nga hinungdan sa iyahang kamatayon.
