Nabalaka ang Canned Sardines Association of the Philippines nga mahimong mominos ang suplay sa barato nga canned sardinas sa kamerkadohan tungod sa padayong pagsaka sa gasto sa produksiyon.
Matod sa grupo, wala aprobahi sa Department of Trade and Industry (DTI) ang ilang gipangayo nga P3 nga usbaw sa Suggested Retail Price (SRP) sa sardinas sulod sa tulo ka tuig.
Ang Executive Director sa asosasyon nga si Francisco Buencamino midugang nga ang suplay sa sardinas sa nasud dili mokunhod, apan ang produksiyon sa mga produkto nga barato o “ekonomiya” mahimong mokunhod kung dili itugot ang pagtaas.
Daghan sa mga Pilipino, matod niya, ang nagsalig sa de-lata nga sardinas isip staple food, ilabi na sa panahon sa kanihit sa kuwarta.
Gipasabot sa DTI nga wala pa silay aprobado nga SRP ug padayon silang nakighinabi sa mga tiggama aron mapabilin nga barato ang presyo sa mga nag-unang palaliton.
Sa laing bahin, ang DTI gikatakdang mohimo og dayalogo sa mga tiggama sunod semana.
