GENERAL SANTOS CITY – Nagpasalamat si Jail Chief Inspector Jesus Singson, labaw sa Bureau of Jail Management and Penology BJMP-GenSan, sa PDEA-12 ug Joint Task Force kon JTF gumikan sa nagmalampuson nga pagkakumpiska sa mga iligal nga droga ug uban pang kontrabando sulod sa Lanton City Jail.
Sumala pa nga hangtod karon wala pa sila nasayod kon sa unsa nakalusot ug nakasulod ang iligal nga droga sulod sa bilangguan, luyo sa hugot nilang pagbantay.
Apan posibleng susama matud pa sa mga report kung asa ginasulod ang droga pinaagi sa pagbutang sa mga kinatawo.
Samtang ang mga hinagiban nga nakumpiska usab ang pulos matud pa mga improvised kon hinimo lang gamit ang mga puthaw ug alambre.
Gihingusgan usab ni Singson nga gibawal ang paggamit ug cellphone sulod sa bilangguan hinungdan nga nahibulong sila kon sa usa kini nakasulod.
Kahibaluan nga 14 ka sachet sa shabu ang nakumpiska sa operatiba sulod sa naasoy’ng jail facility, gawas pa sa laing usa ka hinigtan nga sachet, usa ka plastic bottle nga may empty plastic sachets nga may shabu residue.
Sa kinatibuk-an, mukabat sa 30 gramos sa shabu ang ilang nakumpiska nga may estimated street value nga P225,000.
Gawas niini, nakumpiska usab ang mga drug paraphernalia nga alang sa pagre-pack ug droga.
Bainte kwatro usab ka mga nagkalain-laing hinagiban, mga cellphone, ug drug money nga P12,000 sulod sa selda.
