GENERAL SANTOS CITY – Giduso ni Gensan City Councilor Jose Edmar Yumang nga ipatuman sa dakbayan ang granular lockdown inay nga ipa-ilalom sa General Community Quarantine ang tibuok syudad.
Matud niini, ilawom sa granular lockdown ang balay lang nga sa nagpositIbo maoy i-lockdown ug ang kaduol niining mga balay o dili ba kaha ang usa ka purok.
Gibutyag sa nasampit nga opisyal, nga kung mapatuman ang granular lockdown ang mamahimong tutukan lang sa ayuda mao ang mga apektado nga balay ug dili ang tibuok syudad.
Dako ang pagtuo ni Councilor Yumang nga sa pagpatuman sa granular lockdown dili maglisod ang katawhan hilabina ang mga nagatrabaho. Sa pamahayag pa niini nga mas dali ang pagpatuman sa granular lockdown gumikan dili ingon kadako ang mamahimong epekto sa ekonomiya ug sa pondo sa gobyerno.
Kahibaluan nga sa nahimo usab nga pamahayag ni Dr. Fidel Peñamante, Presidente sa Philippine Medical Association General Santos Chapter nga luyo pa man sa usa ka bulan nga pagpa-ilalom sa dakbayan sa GCQ status nagpabilin gihapon nga taas ang kaso sa COVID 19 ingon man ang covid 19 related death.
Dili paigo ang regular nga GCQ sa kasamtangang status sa dakbayan sa hisgutanang covid.
