GENERAL SANTOS CITY – Nagmalampuson ang natigayon nga grand opening kagabie alayon sa 28th Kalilangan og 78th founding anniversary sa dakbayan.
Nasayran nga hilabihan ka-puno sa mga tawo ang Oval Plaza aron saksihan ang mga nagkadaiyang performance nga gidalit gikan sa mga tulunghaan og institusyon kon asa gipakita ang kultura og kasaysayan sa syudad.
Giusa-usa ni Mayor Ronnel Rivera ang pagtawag ang pangalan sa mga bisita gikan sa Indonesia lakip ang mga mayor gikan sa nagkadiayang lungsod sa nasud.
Sa pakighinabi sa Bombo Radyo, gibutyag ni Masbate City Mayor Rowena R. Tuason nga nalingaw sila nga mga mayor sa pag-adto sa GenSan ilabi na pag-atender sa opening ceremony sa Kalilangan kagabie.
Sumala pa, hilabihan kanindot sa syudad nga sukwahi sa impresyon sa ubang tawo nga dili peaceful. Gani, hilabihan kainit matud pa ang pagdawat sa mga tawo kanila.
Gibutyag ni Mayor Tuason n ga mubalik gayud sa GenSan. Sa pahayag niini, karon lamang siya nakakita ug hilabihan kadako nga isdang tuna kung asa mas taas pa kaniya.
Nasayran nga anaa usab ang presensiya nilang PRO-12 Dir. Gen. Cedric Train og City PNP Dir. Maximo Layugan kagabie. Samtang, wala kapugngi sa mga mayor nga mag-selfie atul sa programa ilabina dihang gipahigayon ang fireworks display.
