GENSAN- Gipahayag ni Marivic Gurung, Bombo International Correspondent sa Nepal, nga sa iyang 33 ka tuig nga pagpuyo sa maong nasud, karon pa siya nakasaksi og ingon kadako nga pagbaha, diin taas ug kusog ang paghaguros sa tubig ug adunay mga balay nga nanga-anod.
Matud ni Gurung, tungod sa taas nga lebel sa tubig, napugos ang pipila ka residente nga mangita og mas luwas ug mas taas nga dapit, lakip na ang mga kabukiran, aron malikayan ang peligro.
Dugang pa ni Gurung, nanglisod ang mga awtoridad sa pagpahigayon sa search and rescue operation tungod sa lapad nga lapok nga mikatap sa mga lugar human sa flash flood.
Matud pa niya, hangtod karon, wala pa makapagawas og klarong advisory ang gobyerno sa Nepal kalabot sa kahimtang sa mga apektadong lugar.
Bisan pa sa hinay-hinay nga pagbalik sa normal sa sitwasyon, nagpabilin ang kalisod sa pagbiyahe tungod sa kalapok ug kadaot sa mga kadalanan.
