GENERAL SANTOS CITY – Magtigum ning adlawa, Mayo 23, Miyerkules, sa Police Regional Office 12 Headquarters sa Brgy Tambler ning siyudad, ang mga representante gikan sa nagkadaiyang ahensiya sa gobyerno.
Kini aron hisgutan ang pagkuyanap sa mga pyramiding scam nga mikuyanap dinhi sa dakbayan ug mga kasikbit-lugar.
Matud ni Lt. Col. Aldrin Gonzales, tigpamaba sa PRO-12, mutambong ang mga representante sa National Bureau of Investigation (NBI), Criminal Investigation and Detection Group (CIDG), Regional Investigation Service, Department of Interior and Local Government (DILG), General Santos City Chambers of Commerce and Industry Inc., City Bankers of Gensan, Department of Trade and Industry (DTI) ug uban pa.
Matud ni Gonzales nga lakip sa giimbitahan ang sakop sa media.
Kahinumduman nga dinhi sa dakbayan gikaingong nanurok nga daw sama sa uhong ang pagdaghan sa investment scheme nga gahatag ug lain-laing pasalig nga porsyento sa gibutang nga salapi.
