Sarangani– Bisan pa sa kusog nga pag-ulan ug kalisod sa kahimtang sa panahon, personal nga miadto si Sarangani Governor Ruel Pacquiao sa mga evacuation center sa Malapatan aron manguna sa paghatod og ayuda ngadto sa mga residente nga naapektuhan sa pagbaha tungod sa epekto sa Habagat.
Gipanghatag ngadto sa mga evacuees nga nagpasilong sa Malapatan Municipal Gymnasium ug Malapatan Central Elementary School ang nagkalain-laing panginahanglanon sama sa ready-to-eat food, food packs, hygiene kits, ug sleeping kits lakip na ang mga trapal, pukot sa lamok, ug uban pang gamit nga gikinahanglan sa mga pamilyang naapektuhan.
Matud sa provincial government, padayon ang ilang paglihok ug pagresponde aron masiguro ang kaluwasan ug matubag ang panginahanglan sa mga Malapateños ilabi na niining panahon sa kalamidad.
Gipasiguro usab ni Gobernador Pacquiao nga magpadayon ang koordinasyon sa lokal nga panggamhanan sa Malapatan ug mga ahensya sa gobyerno aron mahatagan og tukmang tabang ang mga pamilyang naapektuhan sa pagbaha.
