GENSAN- Nakadawat og hulga ang Goldenstate College human nag-post ang usa ka wala pa mailhing indibidwal nga naghulga nga pusilon niini ang mga estudyante ug magdala kini og armas ug duha ka bomba.
Gipahayag ni Goldenstate College Vice Chairman for Finance Dr. Sara Jane Manilay nga nakurat siya sa maong hulga ug dili kini angay isipon nga binuang tungod sa seryoso nga sulod sa gipatik sa maong indibidwal.
Ilaha na matod pang na-report ang insidente sa Cybercrime alang sa imbestigasyon ug pag-ila sa responsable sa maong hulga.
Nanawagan si Manilay sa mga nakaila sa maong indibidwal nga ihatag sa pinakaduol nga police station o sa Cybercrime ang bisan unsang kasaligang impormasyon nga makatabang sa pag-ila ug pagdakop niini.
Nagpahibalo usab si Manilay og pabuya alang sa makahatag og impormasyon nga mosangpot sa pagdakop sa responsable ug pag-atubang niini sa tukmang proseso sa balaod.
Matud ni Manilay, kini ang unang higayon nga nakasinati ang Goldenstate College og ingon niini nga hulga ug dili nila kini pasagdan tungod sa posibleng peligro sa mga estudyante.
