GENSAN– Kasuhan matod pa ni Dr. Sara Jane Manilay ang mga nalambigit sa giingong pagpangwarta gamit ang ngalan sa Golden State College Gensan.
Kini human madiskobrehan ang usa ka peke nga group page nga naggamit sa ngalan sa eskwelahan ug giingong gigamit sa pagpangilad, pagpang-bully sa mga estudyante, pagbaligya og dili awtorisadong uniporme, ug pagpamaligya sa gituohang ilegal nga droga.
Gibutyag ni Manilay, Vice President for Finance sa Golden State College Gensan, nga aduna nay mga suspek nga na-identify may kalabotan sa maong insidente.
Gipasidaan usab niya nga ang mga estudyanteng mapamatud-ang nalambigit sa maong kalihokan tangtangon sa scholarship sa eskwelahan. Matod pa ni Manilay, dili niya pasagdan ang maong insidente ug iyang ipadayon ang tukmang legal nga aksyon batok sa mga responsable.
