Gipaklaro sa Department of Justice (DOJ) nga wala migahin og bisan unsang pondo ang gobyerno sa pagpadala sa mga testigo sa International Criminal Court (ICC) sa The Hague, Netherlands batok kang kanhi Presidente Rodrigo Roa Duterte.
Kini ang tubag ni Justice Secretary Jesus Crispin Remulla sa pangutana kung naggastos ang gobyerno aron matabangan ang mga testigo nga mupasaka og testimonya batok sa kanhing pangulo.
Matud ni Remulla, ang papel lamang sa DOJ karon mao ang pakig-alayon sa ICC kabahin sa unsay mga gikinahanglan may kalabutan sa kaso ni Duterte.
Ang ilang kalihukan limitado lamang sa pagsiguro nga ang mga testigo anaa sa maayong kahimtang ug luwas gikan sa mga hulga sa ilang kinabuhi nga posibleng ilang masinati.
Gipunting ni Remulla nga importante nga mapanalipdan ang kaluwasan sa mga testigo nga buot mutestigo sa ICC alang sa maong kaso.
Tungod niini, padayon ang DOJ sa pakig-alayon sa ICC alang sa mga posibleng dugang nga panginahanglanon nga ikonsiderar sa Pilipinas may kalabotan sa kasong giatubang ni Duterte.
