Gikondena sa gobyerno sa Pilipinas ang giingong “racist” ug “dehumanizing” nga paghulagway sa mga Pilipino sa usa ka materyal nga gipagawas sa state-run media nga China Daily, pipila ka adlaw sa wala pa ang ika-10 nga anibersaryo sa arbitral award nga miila sa soberanya sa Pilipinas sa West Philippine Sea.
Usa sa unang opisyal sa gobyerno nga misaway sa maong post mao si Defense Secretary Gilberto Teodoro Jr., nga miingon nga gipakita niini ang “moral ug intellectual nga kahuyang” sa propaganda machine sa China.
Matud sa Department of Foreign Affairs o DFA, nagsumite na kini og pormal nga diplomatic protest batok sa serye sa mga opinion video ug editorial cartoons sa China Daily may kalabotan sa 2016 South China Sea Arbitral Award.
Lakip sa gisupak sa Pilipinas ang usa ka video nga gipagawas sa maong media outlet diin gihulagway ang usa ka Pilipino isip unggoy nga gipabuto sa tubig gikan sa barko sa China Coast Guard, isip pag-insulto sa desisyon sa arbitral tribunal niadtong Hulyo 12, 2016 nga mibaliwala sa halapad nga pag-angkon sa China sa South China Sea.
Matud sa DFA, milapas na kini sa lehitimong diskusyon sa politika tungod sa paggamit og makapaubos, makawalay dignidad, ug racist nga paghulagway batok sa mga Pilipino.
Gipahayag usab sa DFA nga unang gidala ni Foreign Undersecretary Leo Herrera-Lim ang isyu kang Chinese Ambassador Jing Quan atol sa ilang meeting niadtong Huwebes, diin gipangayo niya nga tangtangon ang maong kontrobersyal nga materyales.
Wala pa gipahibalo sa DFA ang tubag sa Chinese ambassador kabahin sa maong reklamo.
