GENSAN- Gihagit ni Rajah Dominic Datahan Magarin, Bombo International Correspondent sa Thailand, ang gobyerno sa Pilipinas nga seryosong tan-awon ug rebisahon ang “Oil Deregulation Law” isip tubag sa sige’ng pagsaka sa presyo sa petrolyo sa nasod.
Sumala pa ni Magarin, iyang gipakita ang dakong deperensya sa sitwasyon sa Thailand diin ang kagamhanan mismo ang nagkontrola sa presyohan pinaagi sa ilang “Fuel Fund” ug estriktong monitoring aron malikayan ang pagpahimuslos sa mga “Elite group” ug ang ilegal nga “hoarding” sa lana.
Matod ni Magarin, ang maayong panig-ingnan sa Thailand, diin nagpabiling kalmado ang publiko ug normal ang dagan sa negosyo taliwala sa tensyon sa Middle East, usa ka lig-on nga hagit alang sa Pilipinas nga palig-onon ang papel sa gobyerno sa pagpanalipod sa mga konsumidor batok sa dili makiangayong pagsaka sa presyo sa mga nag-unang palitonon.
