Gipasalig ni Energy OIC Secretary Sharon Garin nga ang gobyerno sa Pilipinas nangandam sa bisan unsang worst case scenario nga may kalabotan sa panagbangi sa Iran ug Israel.
Ilabi na ang pagsaka sa presyo sa lana sa kalibotanong merkado.
Matod ni Garin nga sa pagkakaron wala nay angay kabalak-an tungod nius-os na ang presyo sa lana ngadto sa $69 matag baril.
Malaumon ang economic managers nga magpadayon ang pagkunhod sa presyo sa lana.
Gitataw ni Garin nga ang gihimo karon sa gobyerno mao ang pagpangandam sa worst case scenario, partikular na ang posibleng pagkahurot sa suplay sa lana sa nasud nga moresulta sa pagsaka sa presyo
Siya miingon nga ang gobyerno nag-andam sa mga long-term nga mga solusyon alang niini ug usab adunay kapilian sa pagpangita sa ubang mga suppliers sama sa US, Canada, Brazil ug uban pang mga nasud.
Dugang niini nga ang ilang base line sa DOE sa pagdeklarar og state of emergency kon moabot sa $80 matag baril ang presyo sa lana sa kalibotanong merkado.
Gi-report sa ahensya nga ang nasud karon adunay 30 ka adlaw nga buffer stock sa lana.
Nagduda usab si Garin sa posibilidad nga sirad-an sa Iran ang Straight of Hormuz tungod kasupak kini sa interes sa tanan, ilabi na niadtong anaa sa Middle East ug sa tibuok kalibotan.
