Hugot nga gipanghimakak ni Senador Christopher “Bong” Go ug kanhi Justice Secretary Vitaliano Aguirre II ang kalambigitan sa laing ginganlan sa dokumento nga gipagawas sa International Criminal Court (ICC) isip giingong mga kauban ni kanhi Presidente Rodrigo Duterte sa kaso sa krimen batok sa katawhan nga may kalabotan sa gubat batok sa droga.
Sa usa ka pahayag nga gipagawas ni Sen. Go sa miaging semana, iyang gitawag ang mga akusasyon nga walay basehan, one-sided, ug dili nagpakita sa iyang tinuod nga mga katungdanan isip Special Assistant sa Presidente gikan sa 2016 hangtod 2018 ug Executive Assistant sa Mayor sa Davao City gikan sa 1998 hangtod 2016.
Gipasiugda sa senador nga wala siyay partisipasyon, kahibalo, o awtoridad sa giingong mga paglapas, ug gipanghimakak usab niya nga siya ang Chief sa Presidential Management Staff. Gipaniguro ni Go nga magpabilin siyang komitado sa iyang mga katungdanan isip usa ka senador ug pagserbisyo sa katawhang Pilipino bisan pa sa iyang gitawag nga walay basehan nga mga akusasyon.
Gihimakak usab ni kanhi Justice Secretary Aguirre ang bisan unsang partisipasyon sa giingong extrajudicial killings nga may kalabotan sa kampanya sa kanhi Presidente batok sa ilegal nga droga.
Gipasabot ni Aguirre nga wala siya mosuporta ug wala siyay nahibaloan sa giingong mga pagpatay.
Miingon siya nga nahibal-an niya niadtong Septyembre 2025 nga ang iyang ngalan nalakip sa Document Containing Charges nga gisumite sa prosekusyon niadtong Pebrero 13, apan miingon nga wala siyay angay kahadlokan ug andam siyang moatubang sa bisan unsang mga kaso.
Giinsistir usab ni Aguirre nga ang ICC wala nay hurisdiksyon sa Pilipinas human ang nasud miatras gikan sa Rome Statute niadtong 2019.
Dugang niya nga sa dihang siya ang pribadong abogado ni kanhi Presidente Duterte sa Davao, ang Pilipinas wala pa miyembro sa ICC busa dili siya mahimong kasuhan sa bisan unsang mga kalapasan.
Isip Justice Secretary gikan sa 2016 hangtod 2018, miingon siya nga nagtuman lang siya sa iyang mga katungdanan.
Gipasiugda usab niya ang iyang papel sa pag-organisar og miting tali sa kanhi Presidente ug sa mga pamilya sa mga biktima nga sila si Kian Delos Santos, Carlo Arnaiz, ug Reynaldo de Guzman, nga giingong miresulta sa pagpasaka og mga kaso ug pagkabilanggo sa mga pulis nga nalambigit.
Gawas kang Go ug Aguirre, si Senador Ronald dela Rosa ug uban pang kanhing taas nga opisyal ug mga opisyal sa PNP sa miaging administrasyon ginganlan usab nga mga kauban sa krimen.
