GENSAN- Naalarma ang mga personahe sa Bulaong Integrated Transport Terminal sa dakbayan sa Heneral Santos pasado alas-8 sa buntag, kagahapon, Agosto 3 human makit-an ang usa ka gidudahang butang nga nabilin sulod sa usa ka Yellow Bus nga bag-o lang miabot gikan sa Koronadal City.
Sumala kang Marianne Anas, City Admin sa Bulaong Terminal, samtang nag-inspeksyon ang konduktor human makanaog ang tanang pasahero, iyang namatikdan ang usa ka guba nga flashlight nga adunay mga baterya ug mga wire. Tungod sa kahadlok nga posible kining improvised explosive device o IED, wala kini hilabti ug dihadiha silang mitawag sa Philippine National Police aron iparesponde ang Explosive Ordnance Disposal Unit.
Gikordon dayon sa mga otoridad ang maong lugar ug gipagawas ang tanang tawo sa palibot sa bus isip kabahin sa safety protocol samtang gihimo ang inspeksyon. Human sa maampingong pagsusi sa EOD Unit sa General Santos City Police Office, nasuta nga negatibo sa eksplosibo ang maong gidudahang butang.
Kini usa lamang ka daan ug guba nga flashlight nga adunay mga wire sa sulod. Matud pa ni Anas, ang insidente nagpamatuod sa kaimportante sa pagkaalerto sa mga personnel sa terminal, ilabina kung adunay mga unattended baggage o dili kasagarang mga butang nga mabilin sa sulod sa pampasaherong sakyanan.
Gipasalamatan usab sa kapulisan ang mga personnel sa Yellow Bus ug sa terminal tungod sa ilang dali ug husto nga pagreport, nga nakatabang sa pagpanalipod sa kaluwasan sa mga pasahero ug sa publiko.
