Gihulagway ni House Senior Deputy Minority Leader Leila de Lima ang pagpasaka ni Davao City Rep. Paolo “Pulong” Duterte og mga kaso sa cyber libel ug libel batok sa pipila ka mga tigbalita sa nasud isip usa ka matang sa pagpanghadlok.
Sa usa ka pahayag, gikondenar ni De Lima ang maong lakang, nga iyang giingon nga magamit aron babagan ang kagawasan sa paghatag og impormasyon sa publiko.
Ang mga kaso may kalabutan sa mga alegasyon nga gibutyag sa gitangtang nga pulis nga si Rodulfo Gracioso Jr., kinsa miingon nga siya ang naghatud sa mga maleta nga giingong adunay sulod nga kwarta para sa pamilyang Duterte.
Gipadayag usab ni De Lima nga ang pagpasaka og mga kaso sa libel batok sa usa ka media network mahimong isipon nga pagpanglupig sa kagawasan sa prensa, labi na sa pagreport sa mga alegasyon sa korapsyon sa nasud.
Dugang niya nga ang mga nagdumala mahimong motubag sa mga alegasyon, labi na kung ang media mangayo sa ilang bahin, imbes nga dayon nga magpasaka og mga kaso batok sa mga tigbalita.
Matod ni De Lima, kabahin sa responsibilidad sa usa ka alagad sa publiko ngadto sa katawhan ang paghatag og mga katin-awan ug pagtubag sa mga isyu nga gipadangat sa publiko ngadto kanila.
