LAPU-LAPU CITY,CEBU- Gipanglantawan karon sa kapulisan sa Lapu-Lapu City Police Office ang “Love triangle” nga posibleng motibo sa pagpatay sa 47 anyos nga taxi driver sa Sitio Ka-Isko sa Brgy. Mactan, dakbayan sa Lapu-Lapu niadtong Hulyo 2, 2025.
Sa pakighinabi sa Bombo Newsteam kang Police Lieutenant Colonel Christian Torres, tigpamaba sa Lapu-Lapu City Police Office (LCPO), nga usa sa ilang gitan-aw karon ang “love triangle” nga posibleng hinungdan sa iyang kamatayon.
Kini human nila ma-access ang “Facebook messenger” sa biktima uban sa tabang sa PNP Cybercrime Unit.
Dinhi, nasayran nga ang biktima nga si Johnny Burdas adunay batan-ong hinigugma, nga siya usab ang nagsuporta sa pagtuon niini.
Matod niya nga posibleng adunay nasuko pagkahibawo sa ilang relasyon ug gipatay ang taxi driver.
Bisan paman niini, gikonsiderar gihapon sa kapolisan sa dakbayan sa Lapu-Lapu nga tulis ang posibling motibo sa pagpatay ni Burdas human nahanaw ang iyang cellular phone ug pitaka.
Gidugang ni Torres nga base sa mga ebidensiya nga ilang na-recover, aduna na silay nailhang person of interest (POI) sa pagpatay kang Burdas.
Gihangyo usab nila ang ride-hailing app, diin nagtrabaho ang biktima, aron matabangan sila nga mailhan ang tawo nga nagpasakay kaniya sa wala pa makit-an ang iyang lawas-pinusilan sa Brgy. Mactan.
