GENERAL SANTOS CITY -Dismayado usab si Sen. Manny Pacquiao sa nahitabo nga kagubot tali sa players sa Gilas Pilipinas ug Boomers sa Australia, atul sa ilang dula kaniadtong Lunes sa gabii sa Philippine Arena, sa Bocaue, Bulacan.
Reaksyon kini sa fighting senator kalabot sa nahitabong kontrobersyal nga FIBA World qualifying game miaging gabii, kung asa angayan matud pang mangayo ug pasaylo ang Gilas players nga apil sa nahimong kagubot.
Sa pakighinabi sa Bombo Radyo, gihingusgan ni Pacquiao nga isip host, angayan unta matud pang nahimong mas makalmahon ang Pinoy players, ug gipakita gihapon ang maayong batasan, kinsa man sa duha ka team ang may sayop.
Wala na usab unta matud pa mi-apil-apil ang uban nga walay apil sa dula, hilabi na kadtong mga players nga anaa sa bench.
Kahibaluan nga ang senador usa usab ka basketball enthusiast, kung asa gimugna niini ang Maharlika Pilipinas Basketball League (MPBL) nga anam-anam nang ginaatangan sa Pinoy basketball fans.
Samtang, sa nagpadayon nga training camp ni Pacman dinhi sa siyudad, nagpahigayon kini ug walo ka rounds sa sparring sessions kagahapong adlawa, apil ang uban pang training routines, sa Wild Card Gym.
