Gilauman nga mao ang labing taas nga ipresentar sa impeachment trial ang giingong sayop nga paggamit sa confidential funds ni Bise Presidente Sara Duterte tali sa upat ka Articles of Impeachment, sumala sa prosekusyon.
Matud sa prosekusyon, kini tungod kay duha ka ahensya ang nalambigit sa maong isyu—ang Department of Education nga kaniadto gipangulohan ni VP Sara, ug ang Office of the Vice President.
Sumala sa prosekusyon, ang Article I nagpunting sa ₱612.5 milyon nga confidential funds, nga naglangkob sa ₱500 milyon gikan sa OVP ug ₱112.5 milyon gikan sa DepEd, sa panahon nga siya pa ang kalihim sa maong departamento.
Tungod sa money trail nga nalambigit sa duha ka ahensya, gilauman nga mokabat kini og dili moubos sa 31 ka adlaw gikan sa kinatibuk-ang 62 ka adlaw nga gilain alang sa pagdungog, o halos katunga sa tibuok oras nga gitagana sa prosekusyon.
Matud ni House Prosecution Legal Spokesperson Benjamin Tolosa Jr., daghan ang mga dokumento ug mga testigo nga kinahanglan ipresentar aron mapatin-aw ang tibuok proseso sa paggasto sa pondo hangtod sa liquidation report nga gisumite sa Commission on Audit (COA).
Bisan pa niini, giingon sa prosekusyon nga ilang paningkamotan nga mapamubo ang ilang presentasyon pinaagi sa pagtangtang sa ubang mga testigo kung mapamatud-an na ang mga importanteng punto, sama sa ilang gibuhat sa grave threats articles diin unom ka mga testigo ang wala na gipatawag.
Samtang, matud ni House Prosecutor Rep. Terry Ridon, posible nang sugdan sa prosekusyon ang pagpresentar sa isyu sa confidential funds sa Miyerkules, kung mahuman na ang direct ug cross examination kang NBI Director Melvin Matibag sa Martes.
