Napakyas matod pa ang plano sa 18 ka kanhi sundalo sa Philippine Marine Corps nga ibalhin ang atensyon sa publiko gikan sa umaabot nga Senate impeachment trial ni Vice President Sara Duterte.
Sumala ni Rep. Zia Alonto Adiong, nga maoy tigpamaba sa Kamara alang sa impeachment trial, mas nasuko pa hinuon ang katawhan tungod kay klaro kaayo ang tumong sa gihimong pagdungog sa Senate Blue Ribbon Committee niadtong Huwebes.
Gikumpara ni Adiong ang maong hearing sa usa ka “press conference” nga walay impartiality o pagkadili pabor sa bisan kinsa, diin gigamit lamang ang institusyon sa Senado aron hatagan og legalidad ang mga istorya sa maong grupo.
Gilambigit sa mga kanhing sundalo sila ni Adiong ug uban pang mga magbabalaod sa alegasyong pagdawat og minilyong kickback gikan sa mga anomalosong flood control project Hugot nga gilimod ni Adiong ang alegasyon ug giingong wala siya makaila sa maong mga indibidwal.
Tungod niini, nakigkonsulta na siya sa iyang abogado aron makapasaka og angayng kaso sa korte.
Gipasiugda usab ni Adiong nga dili angay tawagon nga “Marines” ang maong grupo tungod kay ilang gidaot ang reputasyon sa prestihiyosong institusyon, ilabi na nga giklaro na sa militar nga natangtang na sila sa serbisyo sa wala pa sila malambigit sa ilegal nga mga kalihokan.
