Ginakompirma pa sa Department of Interior and Local Government (DILG) ang taho nga nasikop si kanhi Presidential Spokesperson Harry Roque.
Kahinumduman nga nagtago-tago si Roque sukad gipadakop sa Quad Committee sa Kamara tungod sa wala pagsumite sa iyang SALN kalabot sa imbestigasyon sa giingong kalambigitan niini sa operasyon sa POGO.
Sa ambush interview sa Villamor, si DILG Sec. Jonvic Remullla niingon nga nakighinabi siya kang Philippine National Police Chief Rommel Marbil ug niingon nga wala pay impormasyon sa pagkasikop ni Roque.
Hinuon, padayon nilang gipangita ug gipanid-an ang lihok sa abogado aron madakpan siya.Nakigkontak na usab ang Philippine National Police (PNP) sa National Bureau of Investigation (NBI) aron kumpirmahon ang taho nga nadakpan na sa mga awtoridad si Roque.
Giklaro sa kalihim nga dili kriminal ang pag tan-aw sa mga kapulisan kang Roque tungod kay wala kini mag-atubang og kasong kriminalidad , apan siya ginapadakopsa Quad Comm isip resource person.
