Hugot nga misupak ang August Twenty-One Movement (ATOM) sa pahayag ni Presidente Ferdinand Marcos Jr. nga ang pipila sa bahandi sa iyang pamilya dili “ill-gotten” o kinawat.
Ang ATOM naporma human mapatay si kanhi Senador Benigno “Ninoy” Aquino Jr. niadtong 1983 ug nailhan sa papel niini sa 1986 People Power Revolution nga mipapahawa kang kanhi Presidente Ferdinand Marcos Sr., amahan ni Presidente Marcos Jr.
Sa ilang pahayag, gitawag sa grupo nga dili tinuod o “fake news” ang giingon sa Presidente. Matod sa ATOM, dili na kini ikatingala tungod kay dugay na kuno nga nalambigit ang pamilya Marcos sa mga alegasyon sa pagpamakak ug propaganda.
Gipahinumdoman usab sa grupo nga niadtong 2018, gisentensiyahan sa Sandiganbayan si kanhi First Lady Imelda Marcos og pagkabilanggo og unom hangtod 11 ka tuig tungod sa paglapas sa anti-corruption law, may kalabotan sa pagbalhin sa kapin 200 milyon ka dolyar ngadto sa Swiss foundations niadtong dekada 1970.
Matud pa sa ATOM, ang pagkadaog sa Malacañang dili naghatag kang bisan kinsa og katungod sa pagtuis sa kasaysayan sa Pilipinas o paglapas sa kamatuoran.
Samtang, nahinumdoman nga atol sa presidential luncheon niadtong Biyernes, Agosto 14, gipanalipdan ni Presidente Marcos ang paghulagway sa pipila ka bahandi sa ilang pamilya isip “ill-gotten wealth.”
Matod sa Presidente, dili kini nakaw nga bahandi tungod kay nakadaog sila sa pipila ka civil cases sa korte.
Gipasabot usab ni Marcos nga usahay makalimot siya sa iyang responsibilidad isip co-executor sa estate sa iyang amahan, apan mas gipanguna niya ang iyang katungdanan isip Presidente sa Pilipinas kaysa sa mga personal o pampamilyang isyu.
Samtang, gipangayo na ni Presidente Marcos sa iyang mga abogado nga sila na ang moatiman sa isyu kabahin sa wala pa mabayrang bilyon-bilyong estate tax sa ilang pamilya.
