Nagtuo si House Prosecutor Rep. Lorenz Defensor nga ang wala paghisgot ni Pangulong Ferdinand Marcos Jr. sa impeachment trial ni Vice President Sara Duterte atol sa iyang ikalimang State of the Nation Address (SONA) nagpakita nga wala manghilabot ang presidente sa nagpadayon nga pagtaral.
Sa interbyu sa Bombo Radyo kang Defensor, iyang giingon nga igo na ang nahimong pahayag ni Pangulong Marcos isip tubag sa November 2024 Zoom Press Conference ni VP Sara diin gihimo sa bise presidente ang hulga batok sa kinabuhi sa pangulo.
Matud niya, dili na kinahanglan nga hisgutan pa ni Pangulong Marcos sa iyang mga pampublikong pakigpulong sama sa Ulat sa Bayan ang iyang personal nga opinyon o baruganan kabahin sa nagpadayon nga impeachment proceedings aron malikayan nga mahugawan kini sa pamolitika.
Sa bahin sa House Prosecution panel, matud ni Defensor nga dili importante kung gisuportahan ba o wala sa presidente ang pagpasaka sa kaso batok kang VP Sara, tungod kay lig-on ang desisyon sa panel nga ipadayon ang pagdungog sa bise presidente tungod sa gipasanginlang impeachable offenses.
Samtang, gitinguha usab ni Defensor nga usa sa mga prosecutor nga mahuman na sa labing mubo nga panahon ang impeachment trial batok sa bise presidente.
Matud niya, mas maayo kung klaro ug yano lamang ang presentasyon sa mga ebidensiya ug testimonya sa mga saksi aron mas sayon kining masabtan sa publiko ug sa mga senator-judge.
Sa laing bahin, gibarugan usab si Rep. Defensor nga kinahanglan hatagan og igong panahon ug patas nga higayon ang iyang mga kapwa magbabalaod nga gipasakaan og kaso may kalabotan sa flood control scandal.
Kahinumdoman nga una nang gipasakaan og daghang kaso si Uswag Ilonggo Partylist Rep. Jojo Ang Jr., samtang nahisgotan usab ni Pangulong Marcos nga hapit nang mapasakaan og kaso ang usa ka “kanhi House Speaker.”
Matud ni Defensor, kinahanglan hatagan sila og higayon nga mapamatud-an nga inosente sila kung tinuod nga wala silay nahimong sala, apan kung mapamatud-an nga adunay kalapasan, angay lamang nga manubag sila sumala sa balaod.
