GENERAL SANTOS CITY – Lauman nga adunay display na nga NFA rice karong semana sa mga pwesto sa bugasan sa City Public Market og sa mga NFA outlets nga anaa sa mga barangay dinhi sa Gensan og Sarangani Province.
Kini ang gibutyag ni Dionisio Hectin, ang provincial manager sa NFA-SarGen human nga miabot na sa syudad ang 100,000 ka sako sa bugas gikan sa Vietnam.
Matud pa sa opisyal nagpadayon ang pagdiskarga sa mga sinakong bugas sa barko nga anaa sa pantalan sa Makar ug gidala kini sa ilang warehouse sa NLSA road, Brgy. Lagao.
Gibutyag ni Hectin, duha ka klase sa NFA rice ang ibaligya karon sa merkado, kadtong tag P27 og P32 kada kilo.
Sa iyang pamahayag, ang ihatag nga alokasyon sa mga Accredited rice retailers ang magdepende sa ilang pondo.
Una nang gibutyag ni Hectin nga ang maong suplay sa NFA rice ang alang sa GenSan ug Sarangani ug gilaumang mulongtad kini sulod sa lima ka bulan.
