Gipasidunggan sa Philippine Coast Guard (PCG) ang boluntaryong pagtabang sa aktor nga si Gerald Anderson ug gihatagan og “search and rescue medal.”
Sa usa ka seremonyas nga gipahigayon sa PCG headquarters sa Port Area, Manila, si PCG commandant Admiral Ronnie Gil Gavan miila ni Anderson sa iyang tabang nga wala mangayo og bayad.
Kini nga medalya gihatag ngadto sa mga indibidwal nga naghimo sa “exemplary” nga aksyon sa pagpangita ug pagluwas nga miresulta sa pagpreserba sa kinabuhi, ug ang boluntaryong pag-apil kinahanglan nga makita bisan sa dakong risgo ug sakripisyo niadtong panahona sa operasyon.
Si Anderson, kinsa usa ka Army reservist ug naghupot sa ranggo nga Auxiliary Commander sa PCG, nag-viral niadtong milabayng buwan dihang nitabang siya sa pagluwas sa usa ka pamilya, lakip ang usa ka bata, nga na-stranded sa Barangay Sto. Domingo, Quezon City, tungod sa baha dala sa Bagyong Carina.
Dili kini ang unang higayon nga niapil si Anderson sa rescue operations, tungod kay mitabang usab siya panahon sa Bagyong Ondoy, nga nakaani og pagdayeg sa nagkadaiyang grupo.
Sa maong pamahayag, ang tigpamaba sa PCG nga si Rear Admiral Armand Balilo nitumbok nga kanunay anaa si Anderson sa relief operations ug disaster rehabilitation sa Coast Guard.
Gipahayag usab ni Balilo nga si Anderson nagpadayon sa pagtabang sa mga Aeta sa Zambales, sa mga pamilyang naapektuhan sa Marawi, ug bisan sa pagdonar og mga medical supplies ug mga tolda sa panahon sa kataas sa COVID-19 pandemic.
