GENSAN – Hugtanong gisaway ni Denmark Suede, usa ka geopolitical analyst ang pahayag ni Sen. Rodante Marcoleta nga mas maayong “i-give up” o buhian na lang ang Kalayaan Island group.
Gitawag ni Suede nga hilabihan ka-bakakon si Marcoleta, lakip na ang iyang anak, tungod kay naghatag kini og sayop ug makalibog nga impresyon sa kahimtang sa teritoryo sa Pilipinas.
Sumala ni Suede, sayop ang pag-angkon nga exclusive economic zone o EEZ lamang ang basihan aron matawag nga teritoryo sa Pilipinas ang Kalayaan Island group.
Iyang gipaklaro nga dugay na kining giokupa ug giila isip kabahin sa nasod, base sa kasaysayan ug sa nagkalain-laing balaod sa Pilipinas. Dili angay ipagamay ang isyu pinaagi sa sayop nga paghubad sa EEZ kay mas lawom ug mas lig-on ang ligal nga basihan sa pag-angkon sa maong teritoryo.
Gidugang pa ni Suede nga ang pahayag ni Marcoleta naghatag lamang og kalibog sa katawhan ilabina sa mga walay igong kahibalo sa geopolitical ug legal nga aspeto sa isyu sa teritoryo.
Tungod niini, iyang gitambagan ang mga Pilipino nga magbasa ug mangita og husto ug tukmang impormasyon aron dili mailad sa mga pahayag nga makadaot sa interes sa nasod.
Gihingusgan ni Suede nga sa panahon sa eleksyon, anaa sa katawhan ang gahum sa pagpili ug sa dili pagpili sa mga lider.
Ang mga politiko moagi ug molabay ra, apan ang teritoryo sa pilipinas magpabilin ug alang kini dili lang sa kasamtangang henerasyon kundili usab sa umaabot.
