GENERAL SANTOS CITY – Usa na ka lone district sa South Cotabato ang General Santos City.
Kini human gipirmahan ni Pangulong Rodrigo Duterte ang balaod nga himuong third legislative district sa probinsya sa South Cotabato ang GenSan.
Sa pakighinabi sa Bombo Radyo GenSan, gibutyag ni South Cotabato 1st District Rep. Pedro ‘Jun’ Acharon Jr. nga maoy nagduso sa House Bill 5162, nga ang First legislative District gilangkuban sa Tupi, Tampakan ug Polomolok.
Ang Second Legislative District gilangkuban sa Koronadal City, Banga, Lake Sebu, Norala, Santo Niñ0, Surallah, Tantangan ug Tboli; ug 3rd Legislative District ang GenSan.
Makaangkon usab matud pa ug bag-ong kongresista ang GenSan apan sa tuig 2022 pa, ug makaangkon usab ug kaugalingong pondo, butang nga gikalipay ni Cong. Acharon.
Ang mudaog nga kongresista sa 2019 Midterm Elections ang mamahimong overseer sa GenSan ug ubang mga distrito.
