GENERAL SANTOS CITY – Nagpabilin nga aktibo ang mensahe ni Police Major Oliver Pauya, labaw sa General Santos City Traffic Enforcement Unit(TEU) sa mga tricycle driver nga panakpon kung walay gipakita nga fare matrix.
Kasagaran sa mga tricycle driver nagbutyag nga pagpanghadlok lamang ang social media post ni Major Pauya tungod wala matud pay feedback ang mga driver nga may pagpanakop nga gihimo kung pakyas magbutang ug fare matrix.
Lahi usab ang mensahe ni Atty. Jong Gonzales, labaw sa Public Safety Office sa dakbayan sa Heneral Santos nga i-block list ug dili na hatagan ug prangkisa ang mga kulorum nga masakpan nga wala musunod sa pahimangno.
Mao usab ang silot niadtong may franchise kung wala misunod sa pagbutang ug kopya sa fare matrix sa ilang tricycle.
Una ng gibutyag ni Atty. Gonzales nga igo lamang gipatuman ang nalatid sa ordinansa kalabutan ang pletihan sa syudad nga P15.00 sa unang upat ka kilometro samtang P1.00 ang bayaran sa sunod nga kilometro.
Paagi usab kini aron kapugngan ang mga drayber nga gapangbastos sa ilang mga pasahero human giawhag ang mga sumasakay nga kuhaan ug hulagway ang tricycle kung adunay reklamo hilabi sa pletihan.
