GENERAL SANTOS CITY – Mularga na karong adlawa ang GenSan Team padulong sa Libertad National High School sa Surallah, South Cotabato, alang sa Soccsksargen Regional Athletics Associatiin kon SRAA Meet 2018.
Matud ni Celso Tingzon, GenSan DepEd Physical Education Sports Supervisor, kapin sa 700 ang delegado sa siyudad, apil na ang coachin staff ug mga officials, kung asa 537 ang mga atleta.
Sumala pa ni Tingzon, sa miaging Sabado, Pebrero 10, may advance party na ang delgasyon, nga gilangkuban sa mga tigluto.
Ilang giuna sa pag-asikaso ang kusina ug mess hall aron hapsay na sa pag-abot sa delegado.
Gikadugang pa niini nga 80% na sa mga uniporme sa mga atleta ang nahatag na. Ug una pa man ang opening sa Pebrero 17, mahatag na ang tanan.
Kahibaluan nga ang LGU-GenSan naghatag ug P2.5 milyon sa live-in training sa mga atleta sulod sa 15 ka adlaw, gawas pa sa P3 milyon alang sa SRAA proper.
Gumikan niini, ilang paningkamutan nga mabakwi ang kampeonato gikan sa probinsya sa South Cotabato.
Nasayran usab nga ang labing unang delegado nga miadto sa South Cotabato mao ang Sarangani nga nakaabot kagahapong adlawa, ug anaa karon sa Tampakan sa nasampit nga probinsya.
