GENERAL SANTOS CITY – Gipasalig ni City PNP Director Senior Supt. Raul Supiter, labaw sa General Santos City Police Office nga ginapaningkamutan ug ginahimo nila ang tanan, aron mahatagan ug hustisya ang pamilya sa mga nahimong biktima sa nasikop nga gikaingong gun for hire nga Jan Eliser Caban.
Kini human sa panawagan sa pamilya sa mga biktima, partikular sa pamilya sa gipusil-patay nga si PO1 Glen Alicarte, nga masayran na kon kinsa ang nagpaluyo o nagsugo kang Caban sa pagpatay ilang mahal sa kinabuhi.
Sa karon, nagpabilin matud pang tak-om ang baba ni Caban kalabot sa alegasyon batok kaniya, apan galaum si Col. Supiter nga muistorya na ang suspek pag-abot sa korte.
Dugang pa sa city PNP director, padayon ang ilang ginahimo nga monitoring sa mga kaso nga gikalambigitan ni Caban, ug ang pagpangalap ug ebidensya nga makatudlo kanila kung kinsa ang gasugo sa nasampit nga gun-for-hire, ug mahatagan ug hustisya ang mga nahimong biktima.
Kahibaluan nga midangop sa sibyahanan ang pamilya Alicarte aron manawagan sa kapulisan, gumikan nakasinati gihapon matud pa sila ug trauma gumikan sa natigayong pagpamusil-patay sa ilang mahal sa kinabuhi nga si PO1 Aligarte.
Matud kang Ging-ging nga igsuon sa nasampit nga pulis, hilabihan kalisod ang mawad-an ug miyembro sa pamilya, hinungdan nga nanghinaot sila nga mailhan na kon kinsa ang nagsugo kang Caban, aron mahatagan na ug hustisya ang ilang mahal sa kinabuhi, ug uban pang mga nabiktima niini.
