GENSAN – Gipatuman sa lokal nga panggamhanan sa General Santos City ang One-Stop Shop alang sa pagkuha ug pag-renew sa business permits, aron mapaspasan ug mapasayon ang pagproseso sa mga negosyante.
Sa One-Stop Shop, anaa na sa usa ka lugar ang tanang buhatan nga gikinahanglan, lakip ang assessment, bayad, ug pagkuha sa permit. Tumong niini nga malikayan ang taas nga linya ug kapoy nga pagbalik-balik sa lain-laing opisina.
Samtang nagsugod ang panahon sa renewal sa business permits, gi-awhag sa syudad ang tanang negosyante nga mag-renew sa sayo aron malikayan ang multa ug penalty.
Gipasidaan usab ang mga negosyong magpadayon og operasyon nga walay updated nga permit, kay kini mahimong ma-penalize sumala sa balaod.
Ang One-Stop Shop usa ka lakang sa syudad aron mas mapalambo ang serbisyo, mas suportahan ang negosyo, ug mapalig-on ang lokal nga ekonomiya.
