GENSAN- Gipahigayon sa siyudad sa Heneral Santos ang usa ka ‘solemn’ ug makahuluganon nga kalihukan isip kabahin sa ika-129 nga anibersaryo sa kamatayon ni Dr. Jose Rizal, ang nasudnong bayani sa Pilipinas.
Ang aktibidad gitambongan sa nagkadaiyang sektor sa gobyerno ug civic organizations sa Plaza Heneral Santos. Ang maong programa gipangunahan sa mga miyembro sa Mason kauban ang lokal nga panggamhanan sa Heneral Santos City.
Miapil usab ang Philippine National Police, Task Force Gensan, Philippine Coast Guard ug ang Bureau of Fire Protection, nga nagpakita sa panaghiusa sa mga ahensya sa gobyerno sa pagpasidungog sa sakripisyo ni Rizal alang sa kagawasan sa nasod.
Usa sa sentrong kalihukan sa programa mao ang paghalad og mga bulak sa monumento ni Dr. Jose Rizal.
Ang matag delegasyon nagpahigayon og wreath-laying isip simbolo sa pagrespeto, paghinumdom ug pagpasalamat sa dakong papel nga gipatun-an ni Rizal sa pagmata sa mga Pilipino batok sa kolonyal nga pagpanglupig.
Ang maong selebrasyon usa usab ka pahinumdom nga ang sakripisyo ni Dr. Jose Rizal magpadayon nga suga ug giya sa pagpalig-on sa demokrasya ug pagka-Pilipino.
