GENSAN- Nagpadayon ang paghatag og ayuda sa lokal nga panggamhanan sa General Santos City ngadto sa mga pamilya nga naapektuhan sa kusog nga linog samtang nagkadaghan ang natala nga kadaot sa syudad.
Sumala kang City Administrator Shandee Pestaño, sulod sa pila ka adlaw sukad sa linog, nakaapod-apod na ang siyudad og inisyal nga mga relief pack sa tanang 26 ka barangay. Bisan pa niini, giila sa siyudad nga adunay mga panimalay nga wala pa makadawat og ayuda, busa nagpadayon gihapon ang pagpangandam ug pag-apod-apod sa dugang relief goods aron maabot ang tanang apektadong pamilya.
Gibutyag usab ni Pestaño nga miabot na sa 22 ka mga tawo ang namatay tungod sa maong kalamidad. Sa pinakabag-ong tala, kapin 3,400 ka mga balay ang hingpit nga naguba, samtang milapas sa 20,000 ka mga panimalay ang partially damaged o adunay nagkadaiyang lebel sa kadaot. Dugang pa niya, sobra 800 ka mga establisemento ug mga building ang naapektuhan sa linog.
Adunay pipila niini nga giklasipikar nga totally damaged ug dili na mahimong okupahan, samtang ang uban gibutangan og yellow tag nga nagpasabot nga mahimo pa silang ma-retrofit ug kinahanglan pa og dugang nga pagsusi. Matod ni Pestaño, ang unang gihimo sa mga otoridad mao ang rapid assessment aron dali nga matino ang kahimtang sa mga istruktura.
Apan tungod sa mga hangyo gikan sa mga tag-iya sa building ug establisemento, adunay mga lugar nga gibalikan sa mga engineer alang sa ikaduhang assessment aron masusi kung luwas na bang gamiton o unsa pa nga mga pag-ayo ang kinahanglan buhaton. Nagpadayon karon ang mga assessment ug relief operations sa siyudad aron matabangan ang mga residente nga naapektuhan sa kusog nga linog.
