GENSAN- Gipagawas sa lokal nga panggamhanan sa General Santos City ang usa ka public advisory kabahin sa paglunsad sa “Operation Pickleball Hunt,” nga gitumong sa pag-inspeksyon sa mga pickleball court, pasilidad ug mga operator nga nagnegosyo sulod sa siyudad.
Ang operasyon gipangulohan sa City Mayor’s Office – Business Permits and Licensing Division o BPLD ubos sa pagpangulo ni Atty. Rowi Arbilon P. Malayag, ug opisyal nga gisugdan kagahapon, Agosto 17, 2026.
Matud sa lokal nga panggamhanan, susihon sa BPLD ang pagsunod sa mga tag-iya sa pickleball court, operators ug commercial establishments sa mga balaod sa pag-operate sa negosyo, ilabina ang pagbaton og balidong business permit ug mga gikinahanglang lisensya.
Gipahinumdoman usab ang mga tag-iya ug operator nga siguruhong updated ang ilang mga business permit ug lisensya ug kini husto nga gipakita sa ilang establisemento aron malikayan ang pagkabalda sa operasyon o posibleng legal nga aksyon.
Pinaagi sa maong operasyon, gitinguha sa lokal nga panggamhanan nga masiguro nga ang mga negosyo nga may kalabotan sa pickleball naglihok subay sa mga lokal nga ordinansa ug mga kinahanglanon sa pagnegosyo sa General Santos City.
